पोशाखात पिन करून जोडतात चलनी नोट
जगात अनेक धर्म, समुदायांमध्ये विचित्र परंपरा पाळल्या जातात. सर्वात अनोख्या प्रथा विवाहसोहळय़ांमध्ये दिसून येतात. क्यूबा या देशात अशाचप्रकारची विचित्र प्रथा दिसून येते. क्यूबामध्ये विवाहसोहळय़ात वधू-वराला नृत्य करता येते. विवाहसोहळय़ात वधू-वर नृत्य करत असल्यास त्यांच्यासोबत नृत्य करण्याची इच्छा प्रत्येकाला होणे स्वाभाविक आहे, परंतु क्यूबामध्ये वधूसोबत नृत्य करणे सोपे नाही.
वधूसोबत नृत्य करायचे असल्यास तेथे याकरता पैसे द्यावे लागतात. नृत्यापूर्वी वधूच्या गाउनमध्ये नोट पिन करून जोडावी लागते आणि त्यानंतरच वधूसोबत नृत्य करता येते. विवाहासाठी मोठा खर्च येत असतो. अशा स्थितीत या प्रथेद्वारे लोक वधू-वराच्या विवाहाचा खर्च काही प्रमाणात उचलण्याचा प्रयत्न करतात. तसेच या रकमेतून वधूला स्वतःच्या पतीसोबत फिरता येईल हा यामागचा उद्देश असतो.
क्यूबामध्ये विवाहाशी निगडित आणखी एक विचित्र प्रथा आहे. विवाहानंतर पाहुणे परतू लागतात, तेव्हा वधू-वर त्यांना आभारादाखल भेटवस्तू देत असतात. याला रिटर्न गिफ्ट समजले जाऊ शकते. सर्वसाधारणपणे या हँडमेड गिफ्ट्स असतात, ज्यावर रिबनद्वरो वधूवराचे नाव लिहिलेले असते. अनेकदा श्रीमतांच्या विवाहात पाहुण्यांना अधिक मूल्याची सिगार भेट केली जाते.