35 वी बाबुराव ठाकुर चषक हॉकी स्पर्धा
क्रीडा प्रतिनिधी /बेळगाव
बेळगाव जिल्हा हॉकी संघटना आयोजित 35 व्या बाबुराव ठाकुर आंतरशालेय हॉकी स्पर्धेत मंगळवारी खेळविण्यात आलेल्या सामन्यात एमआर भंडारी संघाने मदनी संघाचा 3-0, मुलींच्या सामन्यात सेंटजॉन काकती संघाने एमआर भंडारी संघाचा 2-0 असा पराभव करुन प्रत्येकी 2 गुण मिळविले.
कॅम्प येथील मेजर बी. ए. सय्यद हॉकी मैदानावर खेळविण्यात आलेल्या मुलांच्या गटातील सामन्यात एमआर भंडारी संघाने मदनी संघाचा 3-0 असा पराभव केला. या सामन्यात पहिल्या सत्रात 17 व्या मिनिटाला सुजल डिगाइच्या पासवर प्रविण जुटपण्णवरने गोल करुन 1-0 ची आघाडी पहिल्या सत्रात भंडारी संघाला मिळवून दिली. दुसऱ्या सत्रात 27 व्या मिनिटाला भंडारी संघाच्या प्रविण जुटपण्णवरच्या पासवर सुजल डिगाइने दुसरा गोल करुन 2-0 ची आघाडी मिळवून दिली. 41 व्या मिनिटाला एमआर भंडारीच्या सागर वाजंत्रीच्या पासवर प्रविण जुटपण्णवरने दुसरा गोल करुन 3-0 ची आघाडी मिळवून दिली. या सामन्यात मदनी संघाला गोल करण्यात अपयश आले.
मुलींच्या गटात खेळविण्यात आलेल्या सामन्यात सेंटजॉन काकतीने एमआर भंडारी संघाचा 2-0 असा पराभव केला. या सामन्यात पहिल्या सत्रात 19 व्या मिनिटाला धनश्रीच्या पासवर सानिकाने पहिला गोल करुन 1-0 ची आघाडी मिळवून दिली. दुसऱ्या सत्रात 31 व्या मिनिटाला सानिकाच्या पासवर धनश्रीने दुसरा गोल करुन 2-0 ची आघाडी मिळवून दिली. या सामन्यात भंडारी संघाला गोल करण्यात अपयश आले.
बुधवारचे सामने – इस्लामिया वि. बाशिबन यांच्यात सकाळी 11 वाजता तर मुलींच्या गटात जीजी चिटणीस वि. ज्ञानमंदिर यांच्यात दुपारी 12.30 वाजता.