ताबुतांची विविध भागात मिरवणूक-विसर्जन
प्रतिनिधी /बेळगाव
मुस्लीम बांधवांनी मंगळवारी भक्तिभावाने व गांभीर्याने मोहरम आचरणात आणला. पाच दिवस पंजा व ताबूत यांचे पूजन केल्यानंतर मंगळवारी शहराच्या विविध भागातून ताबूत मिरवणूक काढण्यात आली. बेळगाव शहरासह तालुक्यातील अनेक गावांमध्ये गांभीर्याने मोहरम पाळण्यात आला.
शहरात ठिकठिकाणी पंजा व ताबूत ठेवण्यात आले होते. मंगळवारी मोहरमनिमित्त हे ताबूत शहराच्या विविध भागातून मिरवणुकीने किल्ला तलाव व इतर भागात विसर्जित करण्यात आले.
शिवाजीनगर, खंजर गल्ली, काळी आमराई, दरबार गल्ली, गणपत गल्ली, वडगाव, शहापूर यासह विविध भागात दिवसभर मिरवणुका सुरू होत्या. यामध्ये युवावर्गाची संख्या सर्वाधिक होती.
हिंदू-मुस्लीम बांधव एकत्रितपणे मोहरम साजरा करीत असतात. इच्छा पूर्ण झाल्यानंतर अनेकांनी चांदीचा घोडा, लाईट यासह विविध वस्तू दान स्वरूपात दिल्या. मुस्लीम धर्मगुरुंनी मोहरमबद्दल संदेश दिला. शहर व उपनगरांमध्ये मोहरम गांभीर्याने पाळण्यात आला.
बेळगाव जिल्हय़ातील यरगट्टी तालुक्यातील मदलूर गावात हजारो लोकांच्या उपस्थितीत मोहरम आचरणात आला. हिंदू-मुस्लीम बांधव एकत्रितपणे मोहरम साजरा करीत असल्याचे दिसून आले. मोहरममुळे समाजातील एकोपा पुन्हा एकदा दिसून आला.