वृद्धाला अटक : हिरेबागेवाडी पोलिसांची कारवाई
प्रतिनिधी /बेळगाव
हालगीमर्डी येथे गांजा विकणाऱया एका वृद्धाला अटक करण्यात आली आहे. हिरेबागेवाडी पोलिसांनी बुधवारी ही कारवाई केली असून त्याच्याजवळून 1 किलो 558 ग्रॅम ओला व सुका गांजा जप्त करण्यात आला आहे.
बसणगौडा रुद्रगौडा पाटील (वय 66, रा. हालगीमर्डी, ता. बेळगाव) असे अटक करण्यात आलेल्या वृद्धाचे नाव आहे. हिरेबागेवाडीचे पोलीस निरीक्षक विजयकुमार सिन्नूर व त्यांच्या सहकाऱयांनी ही कारवाई केली आहे. या वृद्धावर अमली पदार्थ प्रतिबंधक कायद्यांतर्गत एफआयआर दाखल करण्यात आला आहे.
बसणगौडा यांनी आपल्या शेतात मिरची पिकात गांजा पिकविला होता. 1 किलो 230 ग्रॅम ओला व 328 ग्रॅम सुका गांजा त्याच्याजवळून जप्त करण्यात आला असून त्याची किंमत सुमारे 18 हजार रुपये इतकी होते. हिरेबागेवाडी पोलीस पुढील तपास करीत आहेत.