प्रतिनिधी/अक्कलकोट
अक्कलकोट तालुक्यातील शिरवळ येथे शेतातील बांधावर पडलेल्या तारेचा शॉक लागून एकाचा जागीच मृत्यू झाला. नूरदिन मौला दखणे (वय ५५) रा. शिरवळ ता अक्कलकोट असे मृत व्यक्तीचे नाव आहे.
याबाबत माहिती अशी की, शनिवार दि. २३ रोजी सकाळी ९ च्या सुमारास नूरदिन मौला दखणे हे शेतातील कामे उरकून बांधावरून घरी येत असताना एमएसईबीच्या तुटलेल्या तारेचा शॉक लागून नूरदिन यांच्या छातीला भाजून मोठी दुखापत झाली. विजेचा धक्का जोरात बसल्याने जागेवरच कोसळले. याबाबतची तक्रार मुलगा मैनोदीन याने पोलीस ठाण्यात दिली व त्यानंतर गावातील लोकांच्या मदतीने मयत वडिलांना खाजगी वाहनाने अक्कलकोट ग्रामीण रुग्णालयात दाखल करून तपासणी केली असता उपचारापूर्वीच नूरदिन यांचा मृत्यू झाल्याचे डॉक्टरांनी सांगितलं. त्यांच्या पश्चात तीन मुले व मुलगी असा परिवार आहे. पुढील तपास पोलीस हवालदार सुरवसे करीत आहेत.