वर्षातील 364 दिवस बंद राहते मंदिर
भारताला धार्मिक दृष्टीकोनाचे सर्वात मोठे केंद्र मानले जाते. हा देश लाखो-कोटय़वधी मंदिरांनी व्यापलेला आहे. येथे अनेक मंदिरांचे स्वतःचे एक वेगळे रहस्य आणि कहाणी आहे. उत्तराखंडमधील एका मंदिरात केवळ रक्षाबंधनाच्या दिवशीच दर्शन घेता येते.
या मंदिराचे नाव बंशीनारायण /वंशीनारायण असून ते उत्तराखंडच्या चमोली जिल्हय़ातील उर्गम खोऱयात आहे. मंदिरापर्यंत जाण्यासाठी अनेक लोक ट्रेकिंगची मदत घेतात. उर्गम खोऱयाला बुग्याल देखील म्हटले जाते आणि हे खोरे घनदाट जंगलांनी वेढलेले आहे.
या मंदिरात केवळ रक्षाबंधनाच्या दिवशीच दर्शन घेता येते. प्रथा-परंपरांनुसार येथील महिला आणि मुली भावला राखी बांधण्यापूर्वी देवाची पूजा करतात. येथे भगवान श्रीकृष्ण आणि शिव यांची मूर्ती प्रतिष्ठापित आहे. वामन अवतारातून मुक्त झाल्यावर भगवान विष्णू येथेच प्रकट झाले होते, तेव्हापासून नारदमुनी भगवान नारायणची पूजा येथे करत असल्याची मंदिराशी निगडित एक प्राचीन कहाणी आहे. याचमुळे येथे लोकांना केवळ एकच दिवस पूजा करण्याचा अधिकार मिळाला आहे.
मंदिरानजीक एक भालू गुहा असून तेथे भक्तांसाठी प्रसाद तयार केला जातो. रक्षाबंधनाच्या दिवशी गावातील प्रत्येक घरातून येथे लोणी येते आणि प्रसादात हे लोणी मिसळून त्याचा नैवैद्य देवाला अर्पण करण्यात येतो. मंदिरात भगवान नारायण आणि महादेव तसेच गणेश आणि वनदेवीची मूर्ती आहे.
कसे पोहोचाल...
-प्रथम उत्तराखंडच्या जोशीमठापर्यंत जावे लागेल, जे देहरादूनपासून सुमारे 293 किलोमीटर अंतरावर आहे.
-जोशीमठापासून हेलंग आणि तेथून 15 किलोमीटर अंतरावरील देवग्रामच्या दिशेने प्रवास करावा.
-बंसीनारायण मंदिराचा ट्रेक देवग्रामपासून सुरू होते आणि सुमारे 12-15 किमी लांबीचा मार्ग आहे.