वृत्तसंस्था / दुबई
आयसीसी पुरूषांच्या वनडे सांघिक मानांकनात पाकने भारताला मागे टाकले आहे. बाबर आझमच्या नेतृत्वाखाली पाक संघाने तीन सामन्यांच्या वनडे मालिकेत विंडीजचा एकतर्फी 3-0 असा व्हाईटवॉश केला. या कामगिरीमुळे पाक संघाने आयसीसीच्या वनडे सांघिक ताज्या मानांकनात चौथ्या स्थानावर झेप घेतली आहे. या मानांकन यादीत भारत पाचव्या स्थानावर घसरला आहे.
विंडीजविरूद्धची वनडे मालिका सुरू होण्यापूर्वी पाकचा संघ या मानांकनात 102 मानांकन गुणांसह पाचव्या स्थानावर होता. पाकने विंडीजचा एकतर्फी पराभव केल्यानंतर त्यांनी 106 मानांकन गुणांसह चौथ्या स्थानावर झेप घेतली आहे. गेल्या दोन वर्षांच्या कालावधीत पाक संघाची वनडे क्रिकेटमधील कामगिरी समाधानकारक झाली आहे. पाकने अलिकडेच झिंबाब्वेचा तसेच त्यानंतर दक्षिण आफ्रिकेचा वनडे मालिकेत पराभव केला. त्याचप्रमाणे ऑस्ट्रेलियाचा 2-1 असे पराभूत केले होते. 1998 नंतर पहिल्यांदाच ऑस्ट्रेलियन संघ पाकमध्ये मालिका खेळण्यासाठी दाखल झाला होता. बाबर आझमच्या नेतृत्वाखाली पाक संघाने क्रिकेटच्या विविध प्रकारात आपल्या कामगिरीत सातत्य राखले आहे. पाकचा संघ आता पुढील वनडे मालिका ऑगस्टमध्ये खेळणार आहे.