भारताच्या सीमेत घुसखोरी करताना कारवाई
वृत्तसंस्था/ सीतामढी
बिहारच्या सीतामढीमध्ये दोन महिन्यांपूर्वी चिनी नागरिकांना ताब्यात घेण्यात आले होते. आता एका पाकिस्तानी युवतीला भारतीय सीमेत घुसखोरी करताना अटक करण्यात आली आहे. या युवतीसोबत आणखी दोन जणांना ताब्यात घेण्यात आले आहे. या दोन जणांमध्ये एक नेपाळी नागरिक तर एक भारतीय नागरिक आहे. या सर्व आरोपींची एसएसबीकडून कसून चौकशी करण्यात येत आहे.
भारत-नेपाळ सीमेवर सोमवारी रात्री नेपाळकडून तीन जण भारतीय सीमेत प्रवेश करण्याचा प्रयत्न करत होते. संशयाच्या आधारावर एसएसबी चेकपोस्टनजीक गस्त घालणाऱया जवानांनी त्यांना रोखले होते. ताब्यात घेण्यात आलेली पाकिस्तानी युवती फैसलाबाद येथील रहिवासी असून तिचे नाव खदीजा नूर आहे. तिच्याकडून कॉलेजचे एक ओळखपत्र हस्तगत करण्यात आले आहे.