ऑनलाईन टीम / तरुण भारत :
अंडरवर्ल्ड डॉन दाऊद इब्राहिमच्या हस्तकांकडून पंतप्रधान नरेंद्र मोदी यांच्या हत्येचा कट रचण्यात आल्याचा ऑडिओ मेसेज मुंबई वाहतूक पोलिसांच्या मोबाईल क्रमांकावर आला आहे. या ऑडिओ मेसेजनंतर पोलिसांकडून सखोल चौकशी सुरू करण्यात आली आहे.
मिळालेल्या माहितीनुसार, 20 नोव्हेंबरला मुंबई पोलिसांच्या वाहतूक नियंत्रण क्रमांकावर सात ऑडिओ क्लिप आणि काही मेसेज आले होते. त्यानंतर पुन्हा 21 नोव्हेंबरला 12 ऑडिओ क्लिप आणि काही मेसेज वाहतूक नियंत्रण कक्षाला प्राप्त झाले. यामध्ये एका अज्ञात व्यक्तीने दावा केला होता की, अंडरवर्ल्ड डॉन दाऊद इब्राहिमचे हस्तक देशाचे पंतप्रधान नरेंद्र मोदी यांची हत्या करण्याचा कट आखत आहेत. तसेच, हे हस्तक देशाला बर्बाद करण्याच्या प्रयत्नात आहेत.
अधिक वाचा : धानोरीत अफीम बोंडाचा सात किलो चुरा जप्त
या धक्कादायक ऑडिओ मेसेजनंतर पोलिसांनी तत्काळ या प्रकरणाचा कसून तपास सुरु केला. या प्रकरणाच्या तपासाअंती असं आढळून आलं की, मेसेज करणाऱ्या व्यक्ती पूर्वी एका हिऱ्यांच्या कंपनीत दागिने डिझाईन करत होता. परंतु, मानसिक आजारामुळे त्याला नोकरीवरून काढून टाकण्यात आलं. तो सध्या वर्षभरापासून बेरोजगार आहे. या व्यक्तीवर पोलिसांनी कोणती कारवाई केली? यासंदर्भात अद्याप माहिती उपलब्ध होऊ शकली नाही. पोलीस अधिक तपास करत आहेत.