असोगावासियांना मोठा दिलासा
► प्रतिनिधी/ बेळगाव
खानापूर तालुक्यातील असोगा येथील रामलिंग देवस्थानवर प्रशासक नेमण्यासाठी खटाटोप सुरू होता. मात्र, त्याविरोधात रामलिंग देवस्थानच्या ट्रस्टींनी धारवाड येथील खंडपीठाकडे मनाईसाठी दावा दाखल केला होता. त्यानुसार सुनावणी होऊन न्यायालयाने प्रशासक नेमणुकीला स्थगिती दिली आहे. यामुळे रामलिंग देवस्थानच्या ट्रस्टींना मोठा दिलासा मिळाला आहे.
जिल्हा धर्मादाय खात्याच्यावतीने कमिटी नेमून त्यानंतर विविध मंदिरांवर प्रशासक नेमण्याचा प्रयत्न सुरू झाला आहे. एकप्रकारे मंदिराच्या ट्रस्टींना नाहक त्रास देण्याचाच हा प्रयत्न असल्याचा आरोपदेखील आता विविध देवस्थानांच्या ट्रस्टींकडून केला जात आहे. मुळात धर्मादाय खात्याच्यावतीने जिल्हा धर्मादाय समिती नेमण्यात आली आहे. तीच बेकायदेशीर आहे, असेही काही जणांनी सांगितले आहे.
जिल्हाधिकारी उपस्थित नसताना जिल्हा धर्मादाय समितीची नियुक्ती करण्यात आली आहे. त्यामुळे आता प्रत्येक ठिकाणी आव्हान दिले जात आहे. जिल्ह्यातील बहुसंख्य मंदिरांचा कारभार त्या-त्या मंदिरांच्या जीर्णोद्धार कमिटीकडे किंवा ट्रस्टींकडे सोपविलेला असतो. मात्र, त्याठिकाणी धर्मादाय खात्याचा प्रशासक नेमून गैरप्रकार करण्यासाठी प्रयत्न केले जात असल्याचे अनेकांनी यावेळी सांगितले आहे.
खानापूर येथील रामलिंग देवस्थानवरही प्रशासक नेमण्यासाठी प्रयत्न सुरू होते. त्याविरोधात उच्च न्यायालय धारवाड खंडपीठाकडे स्थगिती मागण्यात आली होती. तेथे स्थगिती मिळाली आहे. या मंदिराच्या ट्रस्टींच्यावतीने अॅड. सुनील देसाई आणि अॅड. पी. जी. भाटे यांनी काम पाहिले आहे.