वृत्तसंस्था/ चेन्नई
चेन्नईचा 15 वर्षीय बुद्धिबळपटू व्ही. प्रणव हा भारताचा 75 वा ग्रँडमास्टर बनला आहे. रुमानियामध्ये अलिकडेच झालेल्या बुद्धिबळ स्पर्धेत प्रणवने विजेतेपद पटकाविले.
प्रणवने यापूर्वी दोनवेळा ग्रँडमास्टर नॉर्म मिळविला होता. रुमानियातील झालेल्या बुद्धिबळ स्पर्धेत त्याने 9 फेऱयांमध्ये 7 गुण घेत विजेतेपद पटकाविताना तिसरा आणि शेवटचा ग्रँडमास्टर नॉर्म मिळवून ग्रँडमास्टर किताबावर शिक्कामोर्तब केला. 2021 साली सर्बिया येथे झालेल्या खुल्या बुद्धिबळ स्पर्धेत प्रणवने पहिला ग्रँडमास्टर नॉर्म तर त्यानंतर गेल्या जूनमध्ये बुडापेस्ट येथे झालेल्या स्पर्धेत दुसरा ग्रँडमास्टर नॉर्म पटकाविला होता. तामिळनाडुतून प्रणव हा 27 वा ग्रँडमास्टर आहे. विश्वनाथन आनंद, डी. गुकेश, आर. प्रग्यानंद हे तामिळनाडूचेच ग्रँडमास्टर बुद्धिबळपटू आहेत. 15 वर्षीय प्रणवने नुकतेच आपले 10 वी पर्यंतचे शिक्षण पूर्ण केले आहे.