प्रतिनिधी / पणजी
राज्यात गेल्या 24 तासांत जवळपास सर्वत्रच पावसाचा शिडकावा झाला, मात्र पेडणेमध्ये मुसळधार पाऊस झाल्याची नोंद आहे. रात्रीच्या दरम्यान पडलेल्या पावसाची नोंद 2 इंचापर्यंत पोहोचली, तर इतर सर्व ठिकाणी अत्यंत तुरळक पावसाची नोंद झाली आहे.
आसानी चक्रिवादळाचा फटका गोव्याला बसला आणि गोव्यातील अनेक भागात बुधवारी रात्री पावसाने हजेरी लावली. पेडणेमध्ये सर्वाधिक 46 मि.मी. एवढी पावसाची विक्रमी नोंद झाली. गुरुवारी राज्यात सर्वत्र पावसाळी वातावरण होते. पणजीत सायंकाळी पावसाची रिपरिप सुरु झाली होती ती पहाटेपर्यंत चालूच होती. पणजीत केवळ 4 मि.मी., म्हापसा 3 मि.मी, फोंडा येथे केवळ 1 मि.मी., जुने गोवे येथे 6.3 मि.मी., सांखळीत 9.4 मि.मी. तर वाळपई येथे 17.5 मि.मी. एवढी पावसाची नोंद झालेली आहे. काणकोण येथे 7.2 मि.मी., दाबोळी 5.4 मि.मी, मडगावात 10 मि.मी, मुरगावात 2.6 मि.मी तर सांगेमध्ये 17.9 मि.मी एवढा पाऊस झाला.
हवामान खात्याने सायंकाळी दिलेल्या माहितीनुसार आज दि. 13 मे रोजी गोव्यात वाऱयाचा वेग वाढलेला असेल व किंचित पावसाच्या सरी पडून जातील. वातावरण ढगाळ राहील.