पुणे / प्रतिनिधी :
पुढील काही दिवस कोकण गोव्यासह मध्य महाराष्ट्र, मराठवाडा तसेच विदर्भात पावसाचा जोर वाढणार असल्याचे हवामान विभागाने सांगितले आहे. दरम्यान, नैऋत्य मोसमी वाऱ्यांना अनुकूल स्थिती मिळाली असून, ते आणखी पुढे सरकले आहेत.
अरबी समुद्रात दक्षिण गुजरात ते उत्तर कोकण किनारपट्टीला समांतर कमी दाबाच्या क्षेत्राची निर्मिती झाली आहे. तसेच पश्चिमी वाऱ्यांचा प्रभाव ही वाढला आहे. यामुळे संपूर्ण पश्चिम किनारपट्टीवर पुढील चार दिवस जोरदार पावसाचा इशारा आहे. याशिवाय मध्य महाराष्ट्र, मराठवाडा तसेच विदर्भातही पाऊस राहील. देशात उत्तरप्रदेश तसेच मध्य प्रदेशमध्ये पुढील दोन दिवस मुसळधार पावसाचा इशारा आहे. याबरोबरच पूर्वोत्तर भारत व पूर्व किनारपट्टीवर पाऊस कायम राहील.
मान्सून पुढे सरकला
नैऋत्य मोसमी वाऱ्यांनी सोमवारी अरबी समुद्र तसेच गुजरातचा बहुतांश भाग व्यापला. पुढील चार ते पाच दिवसात मान्सून राजस्थान, उद्राराखंड, हिमाचल प्रदेश, जम्मू काश्मीरमध्ये धडक मारेल, असे हवामान विभागाने म्हटले आहे.