दमदार पाऊस सर्वत्र पाणीच पाणी
प्रतिनिधी / बेळगाव : सोमवारी दुपारी शहरासह उपनगराला दमदार पावसाने झोडपले. अनगोळ परिसरात सर्वत्र पाणीच पाणी झाले. अनेकांच्या घरांमध्ये पाणी शिरले. गणेशोत्सव काळात पावसाने झोडपल्याने साऱ्यांची तारांबळ उडाली.
सोमवारी सकाळी 11:00 च्या दरम्यान ढगाळ वातावरण निर्माण झाले होते. त्यानंतरच्या सुमारास जोरदार पावसाचे आगमन झाले. शहरापेक्षाही अनगोळ परिसरात दमदार पाऊस झाल्याने अनेकांच्या घरात पाणी शिरले. रस्त्यावर गुडघाभर पाणी साचून होते. सार्वजनिक गणेशोत्सवाच्या मंडपामध्ये पाणी शिरले होते. त्यामुळे अनगोळ परिसरातील साऱ्यांची तारांबळ उडाली. अनगोळ बरोबरच येळ्ळूर, मजगाव, उद्यमबाग, आनंदनगर या परिसरात ही पाऊस झाला.