सांगली / प्रतिनिधी
संजयनगर येथील गुंड तुकाराम सुभाष मोटे (27) याचा खून करण्यात आला आहे. किरकोळ कारणातून हा खून झाला असून मंगळवारी मध्यरात्री ही घटना घडली. याप्रकरणी संजयनगर पोलिसांनी दोघा संशयिताना ताब्यात घेतले आहे.
याबाबत अधिक माहिती अशी, तुकाराम मोटे हा रेकॉर्डवरील गुन्हेगार आहे. महिन्यापूर्वी परिसरातील पेट्रोलपंपावर उधार पेट्रोल दिले नाही म्हणून याठिकाणी असणाऱ्या महिलेचा विनयभंग करुन तिला मारहाण केली होती. तसेच पैसे हिसकावण्याचा प्रयत्न केला होता. याप्रकरणी त्याला पोलिसांनी अटक ही केली होती. त्यानंतर तो जामिनावर मुक्त झाला होता. मंगळवारी संजयनगर परिसरातील तरुणांकडे बघण्यावरुन वाद झाला आणि त्यातूनच हाणामारी झाली. या हणामारीत तुकारामला चाकूने भोसकण्यात आले. त्याला तीन ठिकाणी खोलवर वार झाल्यामुळे तुकाराम जागीच मृत झाला. संजयनगर पोलिसांना याची माहिती मिळताच सहायक निरिक्षक संजय क्षीरसागर व पथकाने घटनास्थळी धाव घेतली. पोलिसांनी तातडीने तपासाची चक्रे फिरवून दोघांना ताब्यात घेतले आहे.