Santosh Nanche’s demand to start Podar School in Dodamarg
आमदार नितेश राणे यांच्याकडे केली मागणी
दोडामार्ग शहरासह आसपासच्या गावातील मुलांसाठी दोडामार्गात पोदार इंटरनॅशनल स्कूलची उभारणी करण्याची मागणी माजी नगराध्यक्ष तथा भाजपचे विद्यमान नगरसेवक संतोष नानचे यांनी कणकवलीचे आमदार नितेश राणे यांच्याकडे केली आहे. कणकवलीमध्ये सुरू केलेल्या पोदार स्कूलप्रमाणे दोडामार्गतही हे स्कूल सुरू करण्याची मागणी श्री. नानचे यांनी निवेदनाद्वारे केली आहे.
खुद्द दोडामार्ग शहर तसेच आसपासच्या गावातील बहुतांश मुले ही शिक्षणासाठी गोव्यात जातात. ते पाहता आरोग्य सुविधानंतर शिक्षणासाठीही येथील आपले लोक गोवा राज्यावर अवलंबून आहेत त्याची एक लोकप्रतिनिधी म्हणून आपल्याला खंत असल्याचे श्री.नानचे यांनी स्पष्ट केले आहे. ते लक्षात घेता या ठिकाणी चांगल्या दर्जाचे शिक्षण देणारे स्कूल उभे राहणे गरजेचे आहे. कणकवलीमध्ये ज्याप्रमाणे पोदार स्कूल सुरू करण्यात आले त्याचप्रमाणे दोडामार्गातही तसेच स्कूल उभे राहिल्यास येथील हुशार विद्यार्थ्यांना चांगल्या शिक्षणाची सोय होईल असेही श्री. नानचे यांनी या निवेदनात म्हटले असून या संदर्भात कार्यवाही करण्याची मागणी त्यांनी आमदार राणे यांच्याकडे केली आहे.
दोडामार्ग / वार्ताहर