मलप्पूरम: हिरो पुरस्कृत 75 व्या संतोष करंडक राष्ट्रीय फुटबॉल स्पर्धेत बुधवारी येथे झालेल्या अ गटातील सामन्यात पंजाबने राजस्थानचा 4-0 अशा गोलफरकाने पराभव करत आपला पहिला विजय नोंदविला. दुसऱया एका अटीतटीच्या सामन्यात मेघालयने केरळची विजयी घोडदौड रोखत ही लढत 2-2 अशी बरोबरीत राखली.
अ गटातील झालेल्या सामन्यात दोन्ही संघांनी पहिल्या 36 मिनिटांच्या कालावधीत दर्जेदार खेळ केला पण 37 व्या मिनिटाला मानवीर सिंगने हेडरद्वारे दिलेल्या तिरकस फटक्यावर अमरप्रित सिंगने राजस्थानचा गोलरक्षक गजराजला हुलकावणी देत पंजाबचे खाते उघडले. मध्यंतरापर्यंत पंजाबने राजस्थानवर 1-0 अशी आघाडी घेतली होती. सामन्याच्या उत्तरार्धात पंजाबच्या खेळाडूंनी आपले पूर्ण वर्चस्व राखले. 63 व्या मिनिटाला मानवीर सिंग डाव्या बगलेतून आगेकूच करताना बॉक्स क्षेत्रात त्रिलोक लोहारने पाडवल्यामुळे पंजाब पेनल्टी मिळाली. त्यावर कर्णधार परमजीत सिंगने पंजाबचा दुसरा गोल केला. पंजाब संघातील बदली खेळाडू तरूण स्लेथियाने शेवटच्या 15 मिनिटांच्या कालावधीत दोन गोल नोंदवून राजस्थानचे आव्हान एकतर्फी संपुष्टात आणले.