सातारा- गेल्या चोवीस तासांपासून कोयना पाणलोट क्षेत्रात पावसाचे धुमशान सुरू असून बारा तासांत कोयनेच्या पाणीसाठ्यात वाढ झाली आहे. सोमवारी सकाळी ८ वाजेपर्यन्त पाणलोट क्षेत्रातील नवजा येथे १९१ मिलिमीटर, कोयना येथे १७७ मिलिमीटर , महाबळेश्वर १०२ मिलिमीटर इतक्या पावसाची नोंद झाली आहे.
संततधार पावसामुळे कोयना धरण झपाट्याने भरत असून धरणात प्रतिसेकंद ३२ हजार २२२ क्यूसेक्स वेगाने पाण्याची आवक सुरू झाली आहे. त्यामुळे सोमवारी सकाळी ८ पर्यंत कोयना धरणाची पाणीपातळी २०७९ फूट आणि ३१.३२ टीएमसी इतका झाली आहे. सोमवारी पहाटेपासून कोयना पाणलोट क्षेत्रातील पावसाचा जोर कायम आहे. येत्या पाच-सहा दिवसांत पावसाचा जोर राहिल्यास कोयना धरणाच्या पाणी साठ्यात पूर्ण क्षमतेने वाढ होऊ शकते.