नवी दिल्ली ः
आम आदमी पार्टीचे नेते आणि दिल्लीचे आरोग्यमंत्री सत्येंद्र जैन यांना मनी लाँड्रिंग प्रकरणात राऊस अव्हेन्यू कोर्टाने 14 दिवसांची न्यायालयीन कोठडी सुनावली आहे. यापूर्वी त्यांना 31 मे ते 9 जूनपर्यंत ईडीच्या कोठडीत पाठवण्यात आले होते. सीबीआयने नोंदवलेल्या बेहिशेबी मालमत्ता प्रकरणाशी संबंधित मनी लाँड्रिंग प्रकरणात त्यांना अटक करण्यात आली होती.
जैन यांना गेल्या महिन्यात अंमलबजावणी संचालनालयाने मनी लाँड्रिंग प्रकरणात अटक केली होती. या प्रकरणाचा 2017 पासून तपास सुरू असून 30 मे रोजी जैन यांना अटक करण्यात आली. त्यानंतर 7 जून रोजी टाकण्यात आलेल्या छापा-झडतीदरम्यान ईडीने कागदपत्रे आणि डिजिटल रेकॉर्ड जप्त केले होते. जैन आणि त्याच्याशी संबंधित असलेल्यांवर छापे टाकल्यानंतर ईडीने 2 कोटींहून अधिक रोख आणि 1.8 किलो वजनाचे सोने जप्त केले. आता जैन चौकशीत सहकार्य करत नसल्याचा दावा ईडीने केला आहे.