Spontaneous response to Sindhumitra Pratishthan’s ‘Akash Darshan’ initiative
विद्यार्थ्यांसह पालक व शिक्षकांचा सहभाग
सावंतवाडी येथील सिंधुमित्र सेवा सहयोग प्रतिष्ठानच्यावतीने ओटवणे येथील श्री रवळनाथ विद्यामंदिर, माजगाव येथील श्री भाईसाहेब सावंत माध्यमिक विद्यालय तसेच सावंतवाडी येथील जिमखाना लाखेवस्तीतील विद्यार्थ्यांसाठी आयोजित करण्यात आलेल्या ‘आकाशदर्शन’ या आगळावेगळ्या उपक्रमाला उत्स्फूर्त प्रतिसाद लाभला. मालवण येथील अभियंता तथा खगोलशास्त्राचे अभ्यासक मंदार माईणकर यांच्या मार्गदर्शनासाठी झालेल्या या आकाश दर्शनाचा विद्यार्थ्यांसह पालक व शिक्षकांनी या कार्यक्रमाचा मनसोक्त आनंद लुटला.
सायंकाळी ६ ते रात्री ११:३० पर्यंत असे सलग ३ दिवस या कार्यक्रमाचे आयोजन करण्यात आले होते. यावेळी मंदार माईणकर यांनी ग्रह व त्यांचे उपग्रह, नक्षत्र, राशी, तारका समूह, धूमकेतू, प्रकाश वर्ष, विविध प्रकारच्या दुर्बीण बाबत विषयी पावर पॉइंट प्रेझेंटेशनच्या माध्यमातून विद्यार्थी तसेच त्यांच्या पालकांना माहिती दिली. नासा व इतर अंतराळ स्थानकांनी अवकाशातून घेतलेल्या चित्रांच्या माध्यमातूनही त्यांनी आकाश समजावून सांगितले. तसेच दिवस-रात्र व ऋतू कसे होतात ? याबाबत सविस्तर मार्गदर्शन केले.
ओटवणे प्रतिनिधी