दुबई : भारतीय संघातील वरच्या फळीत खेळणारा भरवशाचा फलंदाज सूर्यकुमार यादवने आयसीसीच्या ताज्या टी-20 फलंदाजांच्या मानांकन यादीत दुसऱया स्थानावर झेप घेतली आहे. सूर्यकुमार यादवचे स्थान तीन अंकांनी वधारले आहे. यापूर्वी तो या मानांकनात पाचव्या स्थानावर होता.
सध्या भारतीय क्रिकेट संघ विंडीजच्या दौऱयावर टी-20 मालिका खेळत आहे. या मालिकेतील मंगळवारी झालेल्या तिसऱया सामन्यात सूर्यकुमार यादवने 44 चेंडूत 76 धावांची खेळी केल्याने या मानांकन यादीत त्याने दुसऱया स्थानावर झेप घेतली आहे. या मानांकन यादीत पाकचा बाबर आझम पहिल्या स्थानावर आहे. सूर्यकुमार यादव आणि बाबर आझम यांच्यात आता केवळ 2 गुणांचा फरक आहे. बाबर आझम 818 गुणांसह पहिल्या तर सूर्यकुमार यादव 816 गुणांसह दुसऱया स्थानावर आहे.