उंब्रज/प्रतिनिधी
उंब्रज (सातारा) : बेलवडे हवेली ता. कराड येथे चायना बनावटीचे पिस्तूल जवळ बाळगल्याप्रकरणी दोघांवर तळबीड पोलिसांनी कारवाई केली आहे. सोमवार (दि. १) रोजी रात्री साडेआठ वाजण्याच्या सुमारास ही कारवाई करण्यात आली. याप्रकरणी पोलिसांनी योगेश अंकुश पवार (वय 37) व समाधान जालिंदर देशमुख (वय 19) दोन्ही राहणार बेलवडी हवेली ता.कराड यांना ताब्यात घेतले आहे. तळबीड पोलीस ठाण्याचे कॉन्स्टेबल प्रवीण फडतरे यांनी याबाबत फिर्याद दिली आहे.
पोलिसांनी सांगितले की, बेलवडे हवेली येथील मारुती मंदिराच्या पाठीमागे असणाऱ्या बोळात संशयित योगेश पवार व समाधान देशमुख यांना पोलिसांनी पकडले. यावेळी यांच्याकेडे चायना बनावटीचे सुमारे पन्नास हजार रुपये किमतीचे पिस्तूल सापडले. त्यांच्यावर भारतीय अधिनियम शास्त्र कायद्यान्वये कारवाई करण्यात आली आहे. तळबीड पोलीस ठाण्याच्या जयश्री पाटील यांच्या मार्गदर्शनाखाली तळबीड पोलिसांनी ही कारवाई केली.