ज्येष्ठ शास्त्रज्ञांचे प्रतिपादन ः गैरसमज न पसरविण्याचे आवाहन
वृत्तसंस्था / नवी दिल्ली
कोरोना लस घेतल्याने अचानकपणे मृत्यू होऊ शकतो हा गैरसमज असून त्यावर विश्वास ठेऊ नये, असे आश्वासन ज्येष्ठ शास्त्रज्ञांनी केले आहे. कोरोना लसीमुळे शरीरात कोणतीही अशी स्थिती निर्माण होत नाही की ज्याने करून व्यक्तीचा अचानक मृत्यू होईल. कोरोना लस घेतल्यानंतर काही व्यक्तींचा अशा प्रकारे झालेला हा मृत्यू लसीमुळे नसून अन्य समस्यांमुळे आहे, असेही त्यांचे म्हणणे आहे. त्यामुळे अशा मृत्यूचा संबंध लसीशी जोडला जाऊ नये, असे आवाहन आहे.
सध्या सोशल मीडियावर अनेक प्रकारच्या पोस्ट्स पसरविल्या जात आहेत. कोरोना लसीमुळे अचानकपणे मृत्यू ओढवतो अशा तऱहेचे दिशाभूल करणारे संदेश प्रसारीत होत आहेत. यामुळे लस घेण्यास अनेक लोक कचरत आहेत. हा लसीबद्दल गैरसमज पसरविण्याचा हेतूपुरस्सर प्रयत्न असून त्याला कोणताही वैज्ञानिक आधार नाही. अचानक मृत्यू होण्यासाठी अनेक कारणे असू शकतात. मृत्यू झालेल्या व्यक्तीचे वैद्यकीय रेकॉर्ड तपासून या कारणांचा शोध घेतला जाऊ शकतो. मात्र, लसीमुळे असा मृत्यू घडत नाही, असे स्पष्ट करण्यात आले.
अचानक मृत्यू घडण्याच्या प्रक्रियेला ‘सडनऍरिथमिया डेथ सिंड्रोम’ (एसएडीएस) असे संबोधिले जाते. या सिंड्रोमसाठी अनेक कारणे असू शकतात. मानसाची रोगप्रतिकारशक्ती कमी झाली असणे, हृदयासंबंधीचे जुने आजार, अनियंत्रित मधुमेह आणि रक्तदाब, अशा अनेक कारणांस्तव अचानक मृत्यू येऊ शकतो. तथापि यापैकी कोणतेही कारण कोरोना लसीमुळे निर्माण झाल्याचे संशोधनात दिसून आलेले नाही. त्यामुळे लसीना दोष देणे चुकीचे आहे. लस न घेतल्यास कोरोनाची लागण होण्याची दाट शक्यता असते. कोरोनातून बरे झालेल्या व्यक्तींनाही नंतरच्या काळात अनेक समस्यांना तोंड द्यावे लागते. या समस्यांमधून काहीवेळा प्रकृती अधिक बिघडते, असे आढळून आले आहे.
अचानक मृत्यू म्हणजे काय?
वरकरणी निरोगी असलेल्या व्यक्तीचा काहीवेळेला अचानकपणे मृत्यू होऊ शकतो. यासाठी कित्येकदा रुग्णाची कृतीही कारणीभूत असते. हवामानातील बदल, अतिमद्यपान, अति धूम्रपान, या कारणांमुळे सुद्धा अचानक मृत्यू होऊ शकतो. लसीमुळे मात्र अशा प्रकारे मृत्यू झाल्याचे एकही ठळक उदाहरण नाही. लस न घेतलेला निरोगी व्यक्तीही अशा प्रकारे एसएडीएसचा बळी ठरू शकतो.
दोन वर्षातील संशोधन
गेल्या दोन वर्षांत जगभरात विशेषतः भारतात मोठय़ा प्रमाणावर कोरोनाचे लसीकरण झाले आहे. भारतात तर 87 टक्के लोकांनी लसीचे दोन डोस घेतले आहेत. बुस्टर डोसही अनेकांनी घेतले आहे. मात्र, एवढय़ा मोठय़ा प्रमाणावर लसीकरण झालेले असूनही एसएडीएसमुळे मृत्यू पावलेल्यांची संख्या लसीकरणपूर्व काळाच्या तुलनेत वाढलेली नाही. यावरून अचानक मृत्यूसाठी लस हे कारण नाही, ही बाब सिद्ध होते, असे विषाणू तज्ञांचे मत आहे.