क्रीडा प्रतिनिधी /बेळगाव
झेवर गॅलरी चषक 11 वर्षाखालील आंतरक्लब क्रिकेट स्पर्धेच्या उपांत्य सामन्यात युनियन जिमखाना संघाने सीसीआय संघाचा 7 गडय़ांनी तर दाभोली अकादमी गोवा संघाने आनंद अकादमी बेळगाव संघाचा 69 धावानी पराभव करून अंतिम फेरीत प्रवेश केला. अद्वैत पाटील व कियान थोटा सामनावीर ठरले.
पहिल्या उपांत्य सामन्यात सीसीआय संघाने 21.5 षटकात सर्व बाद 45 धावा केल्या. युनियन जिमखानातर्फे अद्वैत पाटील 3, मोहम्मद हमजा 2, अब्बास किल्लेदार व फरहान शेख यांनी प्रत्येकी एक गडी बाद केला.
उत्तरादाखल युनियन जिमखाना संघाने 10.5 षटकात 3 बाद 46 धावा करून सामना 7 गडय़ांनी जिंकला. विश्रुत कुंदरनाडने 13, मोहम्मद हमजाने नाबाद 10 धावा केल्या. सीसीआयतर्फे स्वयम खोत व खंडू पाटीलने प्रत्येकी एक गडी बाद केला.
दुसऱया उपांत्य सामन्यात दाभोली संघाने 25 षटकात 4 बाद 202 धावा केल्या. कियान थोटाने 8 चौकारासह 67, शौर्य चोडणकरने 6 चौकारासह 59, अदीप मिस्कीनने 23 धावा केल्या.
आनंदतर्फे अथर्व करडीने 2 गडी बाद केले. उत्तरादाखल आनंद क्रिकेट अकादमी संघाचा डाव 21.4 षटकात सर्वबाद 133 धावात आटोपला. सचिन तलवार 43, आरुष देसुरकर 31, अमर पटवेगारने 18 धावा केल्या. दाभोलीतर्फे स्वप्नील नाईकने 3, अभिराज कळंगुटकर, निहाल पेडणेकर, पार्थ संकपाळ यांनी प्रत्येकी दोन गडी बाद केले.