मुंबई: राज्यसभेच्या सहाव्या जागेसाठी कोल्हापूरचे कट्टर शिवसैनिक संजय पवार यांचे नाव निश्चित झाले आहे. यावरून शिवसेनेचे नेते संजय राऊत यांना विचारले असता त्यांनी, होय! संजय पवार हा शिवसेनेचा मावळा आहे. मुख्यमंत्र्यांनी या मावळ्याला उमेदवारी देण्याचा निर्णय घेतला आहे. लवकरच त्याबाबत अधिकृत घोषणा केली जाईल. असे संजय राऊत म्हणाले आहेत.
मी पुन्हा एकदा सांगतो शिवसेना दोन्ही जागांवर निवडणूक लढवणार आहे. आणि या दोन्ही जागांवर शिवसेनेचा उमेदवार निवडून येईल, असे संजय राऊत म्हणाले आहेत. कोल्हापूरचे संजय पवार हा शिवसेनेचा मावळा आहे. पवार हे कडवट शिवसैनिक आहे. पक्का मावळा आहे. मावळे असतात म्हणून राजे असतात. पक्ष आणि नेते त्या मावळ्यांच्या जोरावर वर असतात. असेही राऊत म्हणाले आहे.
शिवसेनेच्या दृष्टीने राज्यसभेच्या सहाव्या उमेदवारीचा चाप्टर क्लोज झाला आहे. आमच्याकडून फाईल बंद झाली आहे. असेही संजय राऊत म्हणाले. संभाजी राजे छत्रपती यांचा नेहमीच आम्ही आदर ठेवतो. त्यांच्या कुटुंबाविषयी, गादीविषयी आदर ठेवतो. त्यांच्याबद्दल कायम राहील. त्यांच्यासमोर शिवबंधन बांधण्याचा प्रस्ताव ठेवला. मात्र त्यांना अपक्ष लढायचे आहे. त्यांच्याकडे ४२ मते असतील तर त्यांनी निवडणूक लढवावी. असेही संजय राऊत म्हणाले.