प्रतिनिधी/ नवारस्ता
स्वातंत्र्याच्या अमृतमहोत्सवानिमित्त पाटणच्या सूरज शेवाळे या पॅरा एस. एफ. कमांडोने काश्मिरमध्ये चार्टर विमानातून तब्बल 22 हजार फूट उडी मारून स्वातंत्र्याचा तिरंगा हवेत फडकवला.
सूरज शेवाळे हा सातारा जिह्यातील पाटण तालुक्यातील चोपदारवाडी या गावचा सुपूत्र असून तो 2017 मध्ये भारतीय सैन्यदलात भरती झाला असून सध्या तो जम्मू काश्मिरमध्ये सेवा बजावत आहे. स्वातंत्र्याच्या अमृतमहोत्सवानिमित्त सूरजने हवेत तिरंगा फडकविण्याचा निर्धार केला होता.
सूरजचे प्राथमिक शिक्षण हे गव्हाणवाडी-चोपदारवाडी येथील जिल्हा परिषदेच्या प्राथमिक शाळेत झाले. माध्यमिक शिक्षण मरळी येथील कै. वत्सलादेवी देसाई हायस्कूलमध्ये झाले. उच्च माध्यमिक शिक्षण पाटण येथील बाळासाहेब देसाई विद्यालयात झाले. शेतकरी कुटुंबात जन्मलेला सूरज लहानपणापासूनच अत्यंत जिद्दी मेहनती, धाडसी आणि हुशार आहे. त्याने सैनिक होऊन देशसेवेचे स्वप्न पहिल्याच प्रयत्नात पार पाडले असल्याची प्रतिक्रिया सूरजची आई लता शेवाळे यांनी दिली.
मंत्री देसाई यांच्याकडून अभिनंदन
स्वातंत्र्याच्या अमृतमहोत्सवानिमित्त सूरज शेवाळे यांनी दाखविलेले हे धाडस आणि देशप्रेम अभिमानास्पद आहे. त्यांचे अभिनंदन करत असल्याचे ट्विट राज्याचे उत्पादन शुल्क मंत्री शंभूराज देसाई यांनी केले आहे.