वृत्तसंस्था/ वॉशिंग्टन
अमेरिकेचे अध्यक्ष जोसेफ बायडेन यांनी बहुचर्चित आणि ऐतिहासिक महत्त्वाच्या बंदुक नियंत्रण विधेयकावर स्वाक्षरी केली आहे. यामुळे अमेरिकेमध्ये फोफावलेल्या गण कल्चरला काही प्रमाणात तरी आळा बसेल, अशी शक्यता निर्माण झाली आहे. हे विधेयक काही दिवसांपूर्वी अमेरिकेच्या वरिष्ठ सभागृहाने संमत केले होते.
अमेरिकेत बंदुक किंवा शस्त्र मिळविण्यासाठी फारसे प्रयास करावे लागत नाहीत. शस्त्रविक्री येथे कायदेशीर असून ती खुलेआम चालते. दरवर्षी 4 कोटी गन्स खपतात, असे सांगितले गेले आहे. यामुळे या शस्त्रांचा दुरुपयोगही मोठय़ा प्रमाणावर वाढला असून अनेक हत्याकांडे घडली आहेत. या हत्याकांडांमध्ये अनेक बालके बळी पडली आहेत. त्यामुळे लोकांची शस्त्र खरेदी प्रक्रिया जटील व्हावी या हेतूने हे विधेयक मांडण्यात आले होते. अमेरिकेतील शस्त्रव्यापार जवळपास 10 हजार कोटी डॉलर्स इतका मोठा असल्याचेही सांगण्यात येते.
हे विधेयक अद्यापही फारसे कठोर नाही असे अमेरिकेतील डेमोक्रेटिक पक्षाचे मत आहे. बायडेन याच पक्षाचेच आहेत. तथापि कठोर बंदुक नियंत्रक कायदा ज्येष्ठ सभागृहात संमत करून घेणे अमेरिकेला जमलेले नाही. परिणामी या विधेयकावरही तज्ञांची कडाडून टीका होणे शक्य आहे.