प्रतिनिधी /काणकोण
पैंगीणच्या श्री श्रद्धानंद विद्यालयात आंतरराष्ट्रीय योगदिन विविध कार्यक्रमांनी साजरा करण्यात आला. विद्यालयाचे शारिरीक शिक्षक दुर्गेश गावकर यांच्या मार्गदर्शनाखाली विद्यार्थ्यांनी प्राणायाम, सूर्यनमस्कार व अन्य योगासने सादर केली. त्याचप्रमाणे योग आणि निसर्ग, योग आणि कुटुंब या विषयांवर चित्रकला तसेच घोषणा स्पर्धांचे यावेळी आयोजन करण्यात आले. विद्यार्थी प्रतिनिधी रिद्धी टेंग्से आणि नितिशा रेडकर यांची योगदिनाचे महत्त्व सांगणारी भाषणे झाली.
या समारंभाला पैंगीणच्या माजी जिल्हा पंचायत सदस्या डॉ. पुष्पा अय्या प्रमुख पाहुण्या म्हणून उपस्थित होत्या. त्यांच्या हस्ते समई प्रज्वलित करून कार्यक्रमाचे उद्घाटन करण्यात आले. डॉ. अय्या यांनी योगदिनाचे महत्त्व विषद करताना विद्यार्थ्यांच्या जीवनात योगाचे महत्त्व किती आहे आणि पुढील जीवनात त्याचा कसा लाभ होतो त्याची माहिती प्रात्यक्षिकांसह दिली. दुर्गेश गावकर यांनी आभार मानले.