प्रतिनिधी /पणजी
म्हापसा येथील श्री लक्ष्मीनारायण देवस्थानात श्रावणी बुधवारनिमित्त आज दि. 24 रोजी संध्याकाळी 7 वा. अमीर गायतोंडे कुटुंबियांतर्फे सावंतवाडी येथील प्रसिद्ध युवा गायिका विधिता केंकरे हिचा गायनाचा कार्यक्रम होणार आहे. तिला तबल्यावर नितीन कोरगावकर व संवादिनीवर प्रसाद गावस साथसंगत करतील.
विधिता ही संगीत विशारद असून विविध स्पर्धांमधून तिने पुरस्कार पटकाविले आहेत. तिने रघुनाथ मेस्त्री व आग्रा घराण्याचे पं. उमेश मेस्त्री यांच्याकडून शास्त्रीय गायनाचे शिक्षण घेतले आहे. भारत गायन समाज, पुणे च्या बालगंधर्व स्मृती नाटय़संगीत प्रथम पुरस्कार पटकावून ती बालगंधर्व पुरस्काराची मानकरी ठरली आहे. अटल प्रति÷ान सिंधुदुर्ग आयोजित संस्कृत गीतगायन स्पर्धेत सलग तीन वर्षे तिने प्रथम येण्याचा मान मिळवला. अखिल भारतीय सारस्वत कल्चरल ऑर्गनाझेशन,मुंबई च्या सुगमसंगीत स्पर्धेची ती उपविजेती ठरली. मालवण येथे झालेल्या राम गणेश गडकरी साभिनय नाटय़गीत स्पर्धेत तिने प्रथम पुरस्कार पटकाविला आहे. शिवाय कोल्हापूर, पुणे आदी ठिकाणी अनेक स्पर्धामधून ती चमकली आहे. आता तिने मुंबई विद्यापीठात गायन विषयात पदवी अभ्यासक्रमासाठी प्रवेश घेतला आहे.