माडखोल – सांगेली मार्गावर बामणादेवी तिठा येथील घटना
ओटवणे / प्रतिनिधी–
जंगलातील पिसाळलेला रानकुत्रा अर्थात कोळसुंदयाने चालत्या मोटारसायकलस्वारावर हल्ला केल्याची घटना बुधवारी सकाळी माडखोल – सांगेली मार्गावर बामणादेवी तिठा येथे घडली. सुदैवाने या हल्ल्यात मोटारसायकलस्वाराला कोणतीही दुखापत झाली नाही. मात्र अचानक झालेल्या या हल्ल्यामुळे तसेच पिसाळलेल्या या रानकुत्र्याच्या रुद्रावतारामुळे या मोटारसायकलस्वाराची भितीने गाळण उडाली.
सांगेली खळणेवाडी येथील जयानंद पांडुरंग सावंत आपल्या मोटारसायकलने माडखोल येथील दूध डेअरीला दूध घालून परत येत असताना या कोळसुंदयाने त्यांच्यावर हल्ला केला. या कोळसुंद्याने त्यांच्या रेनकोटच्या पॅन्टचा चावा घेतला. यावेळी त्यांनी स्वतः ला सावरत मोटारसायकल थांबवून बचावासाठी धूम ठोकली.
दरम्यान या कोळसुंद्याने मंगळवारी मध्यरात्री बामणादेवी येथील भर वस्तीतील हरिष लातये यांच्या घरापर्यंत मजल त्यांच्या कुत्र्यांना लक्ष केले होते. मात्र लातये कुटुंबियांनी या कोळसुंद्याला पिटाळून लावले. यापूर्वी चौकुळ येथेही अशाच पिसाळलेल्या कोळसुंदयानी दहा जणांचा चावा घेत जखमी केले होते. या पार्श्वभूमीवर या कोळसुंदयाचा वनखात्याने बंदोबस्त करावा अशी मागणी या भागातून होत आहे.