ऑनलाईन टीम/तरुण भारत
भारतीय अंतराळ संशोधन संस्था (ISRO) ने आज (रविवार) आपले पहिले छोटे उपग्रह प्रक्षेपण वाहन SSLV-D1 प्रक्षेपित करून नवा इतिहास रचला. आंध्र प्रदेशातील श्रीहरिकोटा येथून या उपग्रहाचे प्रक्षेपण केले. SSLV-D1 ने ७५० विद्यार्थ्यांनी तयार केलेला ‘आझादी सॅट’ आणि पृथ्वी निरीक्षण उपग्रह-02 (EOS-02) उपग्रह देखील वाहून नेला आहे. देशातील सर्वात लहान रॉकेटचे प्रक्षेपण यशस्वी झाले असले तरी मोहिमेच्या अंतिम टप्प्यात शास्त्रज्ञांच्या पदरी निराशाच आली आहे.
दरम्यान, कमीत कमी मनुष्यबळाच्या सहाय्याने अवघ्या काही दिवसा सज्ज होत उपग्रह प्रक्षेपण करणाऱ्या इस्त्रोच्या नव्या रॉकेटचे-प्रक्षेपकाचे-Small Satellite Launch Vehicle (SSLV)चे पहिले उड्डाण आज इस्त्रोच्या श्रीहरीकोटा तळावरुन यशस्वी पार पडले. नव्या रॉकेटने त्याचे काम चोख बजावले असले, रॉकेटच्या सर्व टप्प्यांनी अपेक्षित कामगिरी जरी केली असली, उपग्रह जरी प्रक्षेपित झाले असले तरी इस्त्रोने मोहिम पुर्ण झाल्याची घोषणा केलेली नाही.
हे ही वाचा : वर्षा राऊत यांची ईडीकडून ९ तास चौकशी
इस्त्रोचा नवा प्रक्षेपक SSLV ची उंची ३४ मीटर असून व्यास दोन मीटर एवढा आहे. आज सकाळी नऊ वाजून १८ मिनीटांनी श्रीहरीकोटा इथून यशस्वीरित्या SSLV चे पहिले उड्डाण झाले. या मोहिमेला इस्त्रोने SSLV-D1 असं नाव दिलं होते. अवघ्या १०० टन वजनाचा SSLV हा नवा प्रक्षेपक फक्त सहा जणांची टीम अवघ्या सात दिवसांत उपग्रह प्रक्षेपणासाठी सज्ज करु शकते. यामुळे SSLV प्रक्षेपणाच्या माध्यमातून इस्त्रोची मनुष्यबळ आणि पैशांची मोठी बचत होणार आहे. ५०० किलोग्रॅम वजनापर्यंतचे उपग्रह हे ५०० किलोमीटर उंचीपर्यंत प्रक्षेपित करण्याची SSLVची क्षमता आहे. या प्रक्षेपकामुळे लहान उपग्रह प्रक्षेपित करण्यासाठी मोठ्या प्रक्षेपकावर अवलंबुन रहाण्याची वेळ इस्त्रोवर येणार नाही.